Tuchun UN General Assembly Biachahmi Cu Kawlram Mipi Caah Lungtur Dailo A Si Ko Hih

U Kyaw Moe Tun Cohlan ding in Chin Zatlang Bu 4 Telh in Vawleicung Zatlang Bu 358 nih UN ah Ca an Kuat.September 14 ah tuah dingmi UN General Assembly ah Myanmar ram aiawhtu UN palai thimnak tuah ding a si i, U Kyaw Moe Tun hi Myanmar aiawhtu UN palai ah pehzul in cohlan ding in Chin zatlang bu 4 telh in vawleicung zatlang bu 358 nih UN sin ca an ttial.

UN ah ca a kuatu zatlang bu 358 lak ah Chin zatlang bu pawl a simi: Chin Community of Auckland, Chin Community of USA-DC Area, Chin Family Group le Chin Leaders of Tomorrow (CLT) an i tel ve hna.UN General Assembly nih Myanmar aiawhtu ah U Kyaw Moe Tun a cohlan nakhnga Myanmar ramchung le vawleicung ram kip ah Myanmar mi hna nih duhnak langhternak zong pehzul in an tuah hna.

UN ah Myanmar ram a aiawhtu ding palai thimnak kong he pehtlai in UN cungtel ram 9 in sermi “UN Credential Committee” nih UN General Assembly ah cathluan a chuahpi te lai.Atutan UN Credential Committee chungtel ram 9 lak ah US, Russia le China zong an i tel hna.

 

International Crisis Group ah director a simi Richard Gowan nih, “Atutan Myanmar kong hi fawi tein bia an chat kho lai lo dah. Nicaan zong an thawn khawhmi a si,” tiah The New York Times ah a chim.

Credit: The Chin Journal