Tutan donthlennak hi miphun a dawmi hna caah cun hnulei ah kir a ngah ti lo

Kan Dohthlennak Muru Apeh.Caantha kan laak thiam ahcun atu lio caan hi Chin miphun lungrualnak le Chin miphun zalonnak caah lam a tthat bik lio caan a si. Kan mino hna nih an nunnak an pekmi, mipi kan temtuarnak, zatlaknak le kan sunghnak vialte hi laak than dingah caantha bik a si.Kan ngeihchiatnak, kan lungfahnak le kan temtuarnak vialte hi kan miphun tthanghphawhnak ah kan hman lawlaw a herh. Lungthul lo tein hmai kan fon peng i, kan doh peng hna ahcun Chinland le Chin mphun nih zalonnak kan hmuh hrimhrim lai tiah zumhnak ka ngei.Ralhrang nih Rakhine an rak tuk hna i, an mino tampi nih an nunnak an rak pek.

An temtuarnak le an lungfahnak kha an miphun tthangphawhnak, lungrualnak le thawnnak thazang ah an hman. An thawn cang hnu ahcun ralhrang nih duh poah in an namneh kho ti hna lo. A kawmh tu in an kawmh lawlaw cang hna. Rakhine ralkap AA pawl hmanh Covid-19 vaccine an chunh piak hna.Tuchun ahcun Rakhine nih an ram pumpi i, 80% tluk cu an control cang caah anmah duhning in uknak an tlaih i biaceihhnak zong anmah kuttang ah a um cang. Chinland chungah a ummi hriamtlai vialte kan ifuntom khawh ahcun Rakhine ralkap AA tluk cu kan si hrimhrim lai tiah ka zumh.

Kan thazang vialte tha tein kan funtom khawh ahcun kan mipi himnak security kan ralkap nih an laak khawh ahcun tlik le zaam len a hau ti lai lo. Shanram i a ummi Wah State bantuk tiang hmanh kan ser khawh ve ko lai. A biapi mi cu kan thazang vialte funtom i, thawng ngai in hmai i kal a si.Kan thazang kan funtom khawh lo, lungrualnak kan ngeih lo ahcun ralhrang nih kanmah chung lila in a kan thio te lai. Tutan ah kan ral kan tei lo ahcun Chinland le Chin miphun kan dihlak in kan sung kho.Ahohmanh nih Chinalnd le Chin miphun sungh kan duh lai ka zum lo. Tutan donthlennak hi miphun a dawmi hna caah cun hnulei ah kir a ngah ti lomi a si.

Kan tei ahcun zalonnak kan ngah lai. Kan sungh ahcun kan ram le kan miphun kan sung dih ve lai.Tuchun tiangah ralhrang he ikahnak voi 184 a um. Ralhrang 1028 fimtlawl an si. Ka ralkap CJDC chung in minung 58 nih an nunnak an pek. Tuchun tiang idohnak ah ralhrang nih hriamnam thatha an hman nain an kan tei hrimhrim lo. Meithal chia tete a hmangmi, Kan ralkap tu nih tam deuh an fimtawl hna. Kan miphun caah nunnak a pekmi hna hi dothlennak kan tei tik ahcun zungzal in a hmun dingmi, a sangbik mi upatnak rolung kan phun hrimhrim te lai.

Credit:Salai Lairamthang

Author: Salai Ephraim