United Nations General Assembly nih cun Saudi Arabia oil facility rawh nak kongah le Middle East ram chung buaibainak kongah zei tin dah remdaihnak kan ser khawh lai tiah lungretheih taktak in lakhruak ton biaruahnak an tuah cuahmah.hi lakhruak ton biaruahnak ah a hruaitu hna hi UN Secretary General Antonio Guterres a si i ton biaruahnak hmun ah hin Mahatma Gandhi chuah cam tuak a voi 150 tlin nak cu vawlei cung ram ram uk bawi tampi
hna nih upatnak an tuah piak fawn tiah an chim.
UN president Tijjani Muhammad Bande nih cun vawlei cung ram dihlak ah remdaihnak le zalon nak a um khawh nak hnga le thil t’ha lo a chuak dingmi a khamtu dingah UN nih kan i hmai thlak mi cu a si caah vawlei cung ram uk bawi vialte hna nih mah le mah i thangt’hat nak le ningcang lo thil tuah hrimhrim lo ding in nawlpat nak a tuah i,vawlei cungah remdaihnak a um khawh nak hnga caah cun vawlei cung ram uk bawi vialte hna t’uanvo a si tiah a chim.
Cun,UN Secretary General Antonio Guterres nih cun vawlei cung ram uk bawi vialte hna cu zei dang vialte thil nak in minung nun nak hi a biapi cem mi a si caah minung pumpak nih Nuhrin covo an ngeih mi t’ihzah piak t’hiam le minung nun nak humhim piak dingin bia a cah ve hna pin ah vawlei cungah remdaihnak a um khawh nak hnga ding caah biatak tein rian t’uanti dingin nawlpatnak zong a tuah chih ve tiah an chim.hi lio ah Brazilian president Jair Bolsonar nih cun US president Donald Trump cu a ram chungah ralzam le mipem a lut dingmi hna a rak kham mi hna cuning cang lo thil a si tiah faklak in a soisel i China ram zong an chawnleh ning cu ningcang thil a si lo tiah a chim fawn.
Britain prime minister Boris Johnson nih cun a tu lio ah vawlei pi caah t’ih a nung mi cu zei dang thil si lo in technology a san tuk cang caah a si tiah a chim.Japan PM Shinzo Abe nih cun North Korea hruaitu Kim Jong Un cu hmai tonh bak in bia ruahnak ngeihpi ka duh tiah a chim i hi kongah America president Donald Trump zong nih a ka lungtli pi cang tiah a chim.hi ton biaruahnak chungah hin mi pakhat nih minutes 15 chung biachimnak caan ngeih dih a si caah ni nga chung a rau lai a tu tiangah cun zei kong hmanh ah biachahnak an ngeih mi a um hraw rihlo tiah an chim.
Source: BBC