Bangladesh ram chungah ralzam sinak in khuasa mi hna Rohingya Muslim ralzam pawl hna nih cun kawl cozah ralkap hna nih an rak tuk den hna ruang ah a kawl ram an chuah tak ni a voi hnih nak campha cu nizan ah khan an tuah t’han i,kawl ram an rak chuah tak ni a voi hnih nak campha an tuah nak ah cun sandah piah nak an tuah.ralzam pawl hna nih an chim mi cu kawl cozah nih a ram chungah umter le kirter an kan duh a si ah cun a ram mi hmanh ah tlangcung mi pakhat sinak a kan pek awk a si tiah an chim.
Bangladesh ram chungum mi hna Rohingya Muslim ralzam pawl hna kongah Bangladesh cozah le Kawlram cozah hna nih voi tampi ton biaruahnak an tuah cang.cun, a tutan ah Rohingya Muslim ralzam pawl hna nih an chim phuan mi hi Kawl cozah nih an sin ah Palai a voi khat nak a rak thlah lio fiang tein an rak chim cang mi a si na in a kawl cozah nih kan pom hna tiah a let duh bak hna lo tiah an chim.a voikhat nak kawl cozah palai nih an rak ton lio hna ah khan Bangladesh cozah le Kawlram cozah hna nih ralzam pawl hna cu minung 3,450 tluk cu kawlram ah kir dingin biachah nak an rak tuah.
Asinain Rohingya Muslim ralzam pawl hna nih cun a ho hmanh nih kawlram ah kir an duh lo.cun, kan hnungzarh Ca cawn ningani ah khan a kawl cozah nih a voi hnih nak cu Rohingya Muslim ralzam pawl hna cu an rak lem t’han hna tik ah a voi khatnak lio ah bia an rak chim mi bantuk tein an rak leh t’han rih hna i Rohingya Muslim ralzam nih a kawl cozah sin ah kan hal mi nan kan pek le cohlan lo ah cun zei tik hmanh kan kir lai lo tiah an rak leh t’han hna tiah a chim.
Hi tibantuk in Rohingya Muslim ralzam pawl hna nih thil an tuah mi le sandah piah nak an tuah ni ah Bangladesh cozah thinphang in a um i a ram chungah ralzam an um nak hmun dih lak ah ralvengtu ralkap zei maw zat a chiah hnawh hna.asinain buaibainak ngaingai cu a chuak hraw lo tiah an chim fawn. Rohingya Muslim hna nih cun kawl cozah ralkap hna nih ningcang lo in an minung an ral tleihhrem mi hna le an rak thah mi vialte hna caah thlacam nak zong an ngei tiah an chim.
Source: zzima
