American Trump cozah nih a cozah ralkap minung 2000 hna cu Poland ram ah chiah dingin misen a thut cang ruangah Germany cozah thinphang in an um tiah an chim.hi konghe pehtlai in Poland President andrerzej Duda nih cun kap hnih cozah ralkap i pehtlaih nak kongah Trump he White House chungah biachahnak tuah a si cang i Trump cozah nih a ralkap minung 2000 hna cu kan ram ah chiah dingin thawngzamhnak a tuah cang tiah a chim.
Cun Poland cozah nih US cozah sin ah US raltuknak vanlawng jet fighter Fifth Generation F-35 pawl hna cu 32 bak cawk dingin biachahnak tuah a si pin ah Poland ram chungah US cozah ralkap zei maw zat hna cu um dingin misen thut nak kan nei fawn tiah an chim.hi thil kongah US cozah nih Poland ram chungah khua an sak khawh nak ding caah an herh mi chawva vialte hna cu Poland cozah nih a liam piak dih hna lai tiah an chim fawn.
Cun US cozah ralkap minung 2000 hna cu an mah ram bantuk tein Poland ram ah an um khawh nak ding le hmun an khuar khawh nak ding caah timhlamhnak nganpi neih a si.Poland ram ah hin a tu ah US cozah ralkap hna cu minung 1000 an um cang i US ralkap 1000 chiah t’han dingin biachahnak an tuah t’han mi hi a si.cun US cozah nih a sermi Liquefied Natural Gas zong Poland nih cawk dingah a tim fawn.
Poland president le Trump nih a tu bantuk in biachahnak an tuah dih bak in Poland cozah nih US raltuknak vanlawng cawk a timh mi hna cu an mah hmaika bak ah hneksaknak zong tuah a si.Poland cozah hi Soviet Union vanglai leh Cold War ral thawh hnu ah Communist ram hna a t’anpitu le a dirkamh tu hna an si.asinain Russia ram cu a rem bak ve hna lo.hi ruangah Russia nih cun Poland cozah nih US he le NATO pehtleihnak a tuah mi hna cu thil t’halo ngai a tuah a si tiah a chim.
Hi thil ruangah hin Germany cozah nih cun US nih Germany ram ah harsatnak pek a kan timh cang ko tiah an ruah i thing phang ngai in dide a rak ngai ve tiah an chim.Germany cozah nih cun US le Poland cozah i pehtleih hi a duh lo tiah an chim fawn.