US: Democrats Nih Donald Trump Sual An Kawl Nak Ah White House Nih Theihpi A Tim Hna Lo

America Democrats hruaitu pawl hna nih Donald Trump cu America President a sinak in tlak le dawi dingin rian an t’uan nak ah White House nih cun telpi a tim hna lo.US House of Representative pawl hna nih President Donald Trump cu a rian in thlak a si khawh nak hnga ding caah biatak tein rian an t’uan i Trump sual nak cu a lamkip in an kawl cuah mah. House of Representative nih a ruahnak ah cun White House nih a kan t’awi-awm lai tiah an i ruah nak in White House nih cun zei hmanh ah ka telpi hna in ka theih pi hna lai lo tiah a chim.

White House Counsel Pat Cipollone photo.

Hi konghe pehtlai in White House Counsel Pat Cipollone nih cun House Speaker Pi Nancy Pelosi sin ah Ca a kuat i, Democrats le US House of Representative pawl hna nih President Donald Trump sualnak nan kawl ning le dothlainak nan tuah mithil hna cu America Constitution phunghrampi kalh a si caah hi thil kongah White House nih kan i theihpi hna lo.cucaah American mipi hna nih lungtling te le ningcang tein an rak thim mi America President Donald Trump cu kum 2016 inthimnak result kan cohlan lo tiah chim lawlaw ko uh tiah Ca a kuat hna.

House Speaker Pi Nancy Pelosi nih cun mipi hna sin ah Sep 24 ah khan President Trump le Ukraine president Voldymyr Zelensky karlak thil umtu ning cu ningcang a tleihlo ruangah felfai tein dothlatnak tuah a si lai tiah a rak chim. cun,CIA agent chungin Trump sual nak a kawltu min langhter lo mi pakhat nih cun Democrats presidential candidate lak ah an zumh cem mi Joe Biden le a fapa Hunter Biden hna cu Trump nih an sining dothlat dingin le a herhah cun an nun nak tiang hmanh in lak dingah Ukraine president Voldymyr cu a chimh tiah a chim.

House Speaker Pi Nancy Pelosi photo.

Hi tibantuk bia a hung chuah hnu in Democrats le US House of Representative pawl hna nih Trump foih nak ding caah biatak tein t’an an hung la na in Trump konghe pehtlai in t’uanvo latu hna Trump impeachment inquiry kongah nawl ngei tu hna House Intelligence Committee Chairman Adam Schiff, Oversight and Reform Committee Chairman Elijah Cummings le Foreign Affairs Committee Chairman Eliot Engel hna cu White House Counsel Pat Cipollone nih Ca a kuat dih hna.asinain zei tin dah White House Counsel Pat Cipollone Ca cu bialehnak an tuah te lai ti cu theih a si rihlo.

Source:BBC

Author: Salai Ephraim