Vawleicung professional boxer heavyweight champion Deontay Wilder cu a mualpho ko!

Atu lio vawleicung heavyweight champion cu, Deontay Wilder a si. Paṭhawng taktak a si. Pe 6 le lehmah 7 a sang. WBC Heavyweight Title kha 2015-2020 tiang a ngah. Voi 44 aa thong i ahohmanh nih an tei bal lo. Voi khat an i tluk. Voi 42 a tei hna. Atu tan voi 44 nak an i thong i a sung ruangmang ko, mi fanau pa! Tyson Fury nih round 7 nak ah a tei ruangmang ko.

Wilder cu ahohmanh nih an rak tei bal lo. Aa porhlaw i Pathian serhsat in le zeirel lo in bia a chim cang. A chimmi cu, “Pathian hmanh nih an khamh kho lai lo,” tiah Fury kha a ti ko. Kan hnu zarh ah Tyson Fury he cun an van i phomh taktak cuh, round 7nak ah Wilder cu a sung ruangmang ko. Fury nih fawi tein a hrilh ko, mi fanau pa. Bawipa kha zei ah aa relter lo i, Bawipa serhsat in bia a chim i vawleipum theih in a mualpho ko. A sung bal lo mi Wilder cu a sung ruangmang ko.

Amah chan lio ah ahohmanh nih tei bal lo mi minthang taktak mi, Assiria Siangpahrang Sennakherib nih Bawipa a serhsat ve i, Hezekiah Siangpahrang kha a hro i, “Miphun hna pathian hna lakah aho tal nih a ram cu Assiria siangpahrang kut chungin a chanh kho bal maw?” tiah Pathian kha a serhsat. Zan ah Bawipa Vancungmi a va kal i Assiria mi riahhmun ah cun 185,000 a va thah hna. Zingkate i mi nih an thawh tikah miruak lawngte an rak si dih ko.

Sennakherib siangpahrang cu mualpho in hmaichia buin inn ah a tlung. (2Siangpahrang 18,19)Bawipa hi a lung kan lawmhter khawh lo hmanh ah a ngaih kan chiatter lo le kan serhsat lo ding hi a biapi tuk. Bawipa lawmhter le a tehte ṭha si tu hi kan rian lian bik si cio ko seh.(Abraham Ram Lian Khar)