Zeiruangah Chinram Khualipi Hakha Sizung Cu Yangon Mirum Pakhat Nih Atuahmi Sizung Hmanh A Tluk Lo

Ngandamnak lei thlennak le thanchonak: MP ka tlin ahcun.Kan zawtfah caan ah damnak pe khotu siibawi sin fawi tein kan panh khawh lo i siibawi um sehlaw a nunnak a liam hnga lo ding cheukhat an nunnak a liam tawn khi lung a fak khun.Hakha le Thantlang ah thiamsang deuh siibawi ngeih lo ruang ah a zaw tuk cangmi mizaw Mandalay le Yangon kalpi an hau tawn khi lung a fak tukmi a si. Ziah state cozah pakhat nih thiamsangmi siibawi(specialists) tlamtling an chiah khawh lo timi ruah awk ngai a si.

 

 

 

 

 

 

 

 

Chinram khualipi Hakha siizung cu Yangon ah mirum pakhat nih a tuahmi private siizung pakhat hmanh a tluk lo khi kan cozah santlaihlo nak pakhat cu a si.Cozah nih fimcawnnak le ngandamnak caah cozah phaisa(mizapi kan phaisa) an hmanmi a tlawm tuk. Tam deuh an hman awk a si, tam deuh an hman nak hnga ka si khawh chung in Hluttaw le cozah sin ah ka aupi lai. Lam le sul cawhnak deuh ah cozah phaisa an hman i kan miphun caah a herh deuhmi ngandamnak le fimcawnnak caah cozah phaisa tlawm tuk an hman hi an thlen a hau cang.

 

 

 

 

 

 

 

MP ka tlin ahcun Mandalay le Yangon kal hau ti loin Hakha ah siibawi specialist(a thiam khunmi) tling tein an umnak hnga, zawtnak zohfel khawhnak seh thilri tlamtling a umnak hnga le Thantlang ah siibawi caan tling tein an um zungzal nak hnga fak piin ka aupi lai.Keimah meehmun ah cun Hnaring, Fanthen, Ngaiphaipi, Khuahrang, Hmawngtlang, Hriphi, Khuabung le Zephai ah siibawi pakhat cio tal chiah ding ah cozah ka hal lai. Mah siibawi cu pawngkam khua zong nih zawtfah caan ah fawi tein auh khawh le kal hnawh khawh a si lai.

 

 

 

 

 

 

 

 

 

 

 

 

Khuate dihlak ah siibawi chiah cu a si kho rih lai lo caah ngandamnak lei cawnnak a ngeimi nurse pakhat cio tal chiah hrimhrim a herh. Khuate kip ah tlangrai zawt le emergency caan ah hman khawh ding sii-ai tlamtling deuh in a um nak hnga kaa zuam lai. Khual a tlawng lengmang i khuate ah a um theng lomi nurse or siibawi cu a rian chiah ding fial colh a si lai, dawtnak lungthin in rian tuan a duhmi lawnglawng rian pek a si te lai.

Ref:Salai Lungthli Tum