Chinese President Xi Jingping Le Aung San Suu Kyi Ton Biaruahnak

Tu chun ah tuah dingmi Second Belt and Road Forum for International Cooperation caah Chinese President Xi Jinping nih Myanmar’s State Counsellor Aung San Suu Kyi cu nizan cacawn nithumni ah khan tonnak a ngeih. Hi tonnak an ngeih ah biapi te in an chimmi cu China le Myanmar karlak hawikom ttha sinak kong a si. Chinese President Xi nih a chimmi cu, hi a liannganmi “Paukphaw” (fraternal) kong ah hin siseh China le Myanmar i hawikomhnak hi kan nih China nih cun pehzulh in tthanchoter kan duh ko. Cuticun ram hnih ca ah hlawknak tampi a chuah chinchin khawhnak ding le kan i hawikomhnak hna hi tthancho ter kan duh, tiah a chim.

President Xi nih a chim rihmi cu, kum vui ah tuah dingmi a voi 70 nak China le Myanmar i hawikomhnak ah hi hlunghlai ngai in tuah kan duh ko. Cuticun ramhnih hna nih a lamkip in kan cawlcang veve hna lai i a hlunhlai khawhchung in kan tuah awk a si. Kan nunphung siseh minung le minung i thlennawn tibantuk le cubantuk in a lamkip in kan i pehtlaihnak hi fehter chin lengmang kan i zuam hna la. Kan zatlang nun tiang in i hrawm kho ding in kan i zuam lai. Cubantuk in rian kan ttuah khawhnak ding ah cun ram hnih kan mipi hna lungtlinnak le cawlcanhpinak zong kan herh, tiah a chim.

China nih Myanmar hi economy lei in si seh zatlang nun in si seh a tthancho ding hi kan duhpiakmi a si. Myanmar cozah nih ramchung ah daihnak tuah ai zuam lengmang mi cung zong ah hin kan luntlinpi hna in kan conglomh ngaingai hna, tiah a chim chih. China hi Myanmar ramchung ah daihnak a um khawhnak hnga rian ttuan ding in timhcia kan si ko. China le Myanmar ramri pawl hna zong ah daihnak a um khawhnak hnga a si khawhchung in kan i zuam ko, tiah President Xi nih a chim.

Myanmar cozah nih ramchung ah daihnak le khat le khat karlak ah i sersiamnak a um khawhnak hnga rian nan ttuanmi cung ah hin kan in lungtlinpi ngaingai hna. Cun Belt and Road Initiative rian Aung San Suu Kyi nih a hruaimi cung zong ah hin kan i lawm ngaingai, tiah Xi Jingping nih a chim.

Hi Belt and Road tang ah hin China nih cun ram hnih karlak pehtlaihnak hna hi tthanchoter ding in kan lung a tling ko. Cuticun China-Myanmar Economic Corridor hna hi tthanchoter chin lengmang i kaphnih mipi caah hlawknak a chuah chin lengmang khawhnak hnga rian ttuantti ding in kan nih cu timhcia kan si ko, tiah a chim.

Aung San Suu Kyi Bia Chimmi

China le Myanmar cu ram innpa le hawikom tthan an sinak a langhter hnu ah Myanmar ramchung ah daihnak a um khawhnak hnga rian an ttuannak cung ah lawmhnak bia an chimmi ruang ah ai lawmhnak a langhter.

Myanmar zong nih hi Belt and Road Initiative hi a hramthok te in kan duhmi a si ko. Hi chung ah China he kutsih in rian ttuantti ding hi kan i ruahchanmi a si. Cuticun hmunkhat te ah kaar kan hlangti hna lai i a lamkip in hi kan i pehtlaihnak le hawikom ttha kan sinak hi tthanchoter ding cu kan duhmi a si. Cuticun kan mipi hna zong nih hlawknak an hmuh khawh veve nak hnga, tiah a chim.

Myanmar zong China le Myanmar ramri hna ah a ummi China ralveng pawl himnak ding hi biapi te in kan ruahmi a si ko. Kanmah rian ah kan i chiahmi an si ko, tiah a chim. A peh rihmi cu, UN Charter ah China dirhmun kong ah siseh Myanmar cung ah nan lungput ruang ah kan i lawm hringhren. Myanmar he hmunkhat te ah rian ttuanttinak tthanchoter nan duh ve nak cung ah kan i lawm, tiah a chim.