Holh Hi Amah Tein A Nungmi A Si Lo A Chimtu Le A Holhtu An Um Lawngah A Nung

Holh hi amah tein a nungmi a si lo i, A chimtu le a holhtu an um lawnglawng ah a nung. A holhtu le a chimtu an um lo ahcun a thi.Zantlai thawngrii a daih hnu dei lei tiangin khuaza ka ruat tawn. Thil pakhat nih merem thiam loin a ka tuah tawn, cucu zeidang pi a si hrim lo. A biapi tukmi kan Laiholh kong hi a si. Ka nolh t’han rih ko lai a biapi tuk hringhran mi kan Laica kong a si. Laiholh a hmangmi Chinmi hna nih kan Laiholh & Laica kong hi kan daithlanh deuh tawn ko rua hlah maw ti khi ka ruah lengmangmi cu a si. Chin miphun nih kan Caholh kong hi kan ruah t’han a hau hrimhrim cang. Kan tuaktaan t’han a herh, kan kherhhlai i a thar hrimhrim in kan t’anh t’han a herh ko cang.

 

Khuathlang lei Laimi;Mizoram ah khua a sami Laimi tampi cu Laimi ka si ti hmanh, i hngal ti loin mi tampi khua an sa hna. Cu hna cu Mizoram District kip ah hmuh khawh awk in an um. Laimi ka si ti aa theimi hmanh nih Laiholh Laica t’anh ti loin i zahpinak le Mar(Mizo) kan unau hna uar tuknak lungthin tenau ruahnak nih a khuhchilh hna. Mizoram Laimi zatceo hrawng nih nihin ni tiang hrimhrim in mah bantuk lohtlaunak lungput an ngeihnak a ruang bik hi, a liamcia kan Laimi hna nih kan Miphun tuanbia felfai in an hngalhfian lo caah le Innt’ek lungput siloin Mipeem lungput an rak i ngeih sual caah a si.

A ngaingai tiah ahcun Lai Miphun hi a peemmi miphun siloin rualrem tein dawtnak te he mah miphun pin ah Mar(Mizo) tiang chiah a ei i a uktu miphun kan rak si.Kha hlan deuh Khuathlanglei khua a sami kan Miphun hna nih Caholh tlaihchannak fek tein ngeih nakding caah chimh cawnpiak khotu hruaitu an rak chambau tuk caah a si. Cucaah tuchun ni tiang Laimi si ko bu ah Laiholh dohtu le Laimi sinak zahpi hmangmi an tam tuk rihnak hi a si.

 

Nain; Hlan Laimi kan Pupa hna nih Laiholh kong an rak daithlanh tukmi kha ngaithiam hna in, Laiholh t’anh hngal loin an rak um caah Laifa tampi an tlaunak ruang an palh cangmi kha fimchimtu ah i ser in, Nihin Mizoram chung um Lai Autonomous District Council chung i Laifa le Lai mino hna nih biatak tein Laiholh Laica an dirkamh t’han cang. Mah thawngpang hi thlitu men a si lo, mithmuh kut tongh in a hung cangmi Pathian khuakhan cia biathli a si. Lawngtlai District ah Sianginn tangriat tiang Laica an cawng cuahmah, Lai Cozah riant’uanmi poh nih Laica an thiam lai ti a si. Mizoram Lai house a umnak poh ah Laiholh cawnnak an tuah. Lai Idol an tuah cang, Lawngtlai LIKBK khrihfabu Nubu hna nih Laiholh in caan hman an thawk cuahmah cang. Laimi TV (Lairam Media Group) in thawng an thanh cang.

 

Lai Baibal Thiang le Lai Hlabu sak an i tim cang. Laica in The Phongpi Post Newspaper (Mizoram ah Laimi nih Laiholh in chuahmi thawngzamhca hmasa bik a si) an chuah khawh cang. Cu tluk in Mizoram um Laifa hna nih miphun sinak hrampi Laiholh an dirpi mi hi Cung Pathian hrimhrim aa lawm lai ka zumh. Hi thawngpang kan theih bak in khuachak lei Laimi ramzakip a ummi hna nih “kan i lawm” ti lawng tiin dai ziar in kan cuanh hna awk si lai lo. Mizoram ah LADC ramchung si lomi ah Laifa tampi a tlaumi chanchuah an herh rih. Cu vialte hna cu kan chawva le kan thlacamnak he kan chanchuah hna a herh hringhran ko. Laica an t’ial thiam t’han khawh nakhnga, Laimi an sinak hngalhter i Laiholh in holh an thiam i, Laiholh in holh kha an tlaihchan chin khawhnak dingah chawva in biatak tein kan dirpi ve hna a herh tuk lio caan a si.

By Salai Thomas Lian Thihlum Peh Than Ding