Lunglomnak Taktak Cu Mah Hi A Si: CNF Le Kan Chin Miphun Caah Lunglawmhnak Tuanbiathar!

CNF General Secretary Pu Thla Hei le Camp Victoria Development Project (CVDP) Director Pu Matt Nguntling ni (15) rauh in kan Chin miphun umnak USA ram khuapi (9) ah Fundraising an va tuah nakin zahan Indianapolis khua an rak phan tthan. Nihin chun CVDP Nunkeng Pu Vanceuuk Khenglawt, keimah le anmah pa hnih tiin lunglawmhnak chuncaw kan ei tti hnu ah zeizat setdah hmuh cawlh ding aa fiang cang timi kan tuah.

Hi Camp Victoria Development Project caah hmuhcawlh ding aa fiang cang mihi $232,000 a si i, zeizat setdah kan nin bawmh hna lai ti mi kan ni ruat taa rih lai a timi pawl rak chap mi he cun $250,000 hi cu a tlawmbik a chuak lai tiah ruahchannak ngeih a si. US$250,000 hi cu miphun dang caah cun a tam lai lo nain, kan mah chin miphun caah cun mah zah zah phaisa zarh 2 chung ah kan hmuh khawh, bawmhnak kan pek khawh hi cu a um bal rih lomi lunglawmh nak tuanbiathar tak tak a si. A pe tu pakhat cio lungthin chung ah dawtnak thlarau aa phuang i, Pu Thla Hei le Pu Matt Nguntling hmurka pathian nih kan miphun caah a hman.

 

Vawlei cung tuanbia zoh tik ah miphun tthawng kan ti mi hna hi minung an tam ah a rak si lo. An lung aa rual maw rual lo ti mi rung tu ah a rak si. A lung aa rual lo mi cu zeizat an tam zong ah miphun tthawng ah an ni chuah thai tak tak bal lo. Teinak a hmu tu miphun rak ti mi pauh pauh hi a lung aa rual mi an rak si. Tutan CNF caah phaisa bawmhnak kan pek minih hin a langh ter mi cu Chin miphun a ngai ngai ni a chuah tik, a biapi mi thil kan tawn tik ah cun kan lung aa rual ti hi a si ko. Lungrualnak tak tak ti mi cu hi bantuk thil biapi mi ah kan thazang a um mi dihlak in kan chuah tti hi a si. Hi kan lungrualnak hi Chin miphun vialte caah lawmhnak thawngttha a si i, CNF caah thazang thar a si.

 

Hi Chin miphun hawi vialte lungrual tein thazang vun chuah ttinak ah aa tel rih lo mi hawi le vial te rak kan tel pi ve uh tiah bochannak he kan nin sawm hna. Miphun zawnruahnak le Chinram dawtnak he a pee tu kan hawi le pakhat cio nan cung ah kan ni lawm i, kan biak kan pathian nih a let tampi in thlachuaah in pe chin ko hna seh.

 

Credit:Daniel Sakhong