Russia Cozah Nih Vawlei Pi Mithmuh Ah Anti Ballistic Missile Cu Tihnung Taktak In Hneksak Nak A Tuah Hnawh Hna

Russia cozah nih cun a sermi hriamnam anti-ballistic missile bomb cu zahan ah khan vawlei pi theih bak in Central Asia ram chung khuapi a si mi Kazakhstan bak ah hneksak nak a tuah i,hlawhtlinnak zong an hmu tiah an chim. cun,Russia nih anti-ballistic missile bomb a sermi cu Russian Ae­ rospace Forces ralkap pawl hna kut ah a chiah i Russian Ae­rospace Forces pawl hna nih hman a herh an ti nak zawn paoh ah hman ding a si lai tiah an chim.

Russia anti-ballistic missile bomb hi hneksak nak an tuah lai ah an i timhlamh lio le moto lian mi cungah an phurh lio tibantuk pawl hna cu Russian Defence Ministry nih vawlei cung rampi mit hmuh bak ah twitter ah a video in a tar i,cu video cu minutes 1.56 tluk zoh a si tiah an chim.asinain Russia cozah nih a tu tan i an hriamnam hneksaknak an tuah mi anti-ballistic missile bomb kongah chim fian nak an tuah lo.

Hi anti-ballistic missile bomb hi zei tluk cak in dah rian a t’uan khawh ti mi le zei tluk hlat in dah hman awk a si?zei can dah a zuan khawh tibantuk pawl zei hmanh chim fian nak an tuah duh lo i,hlawhtlin nak kan hmuh ti lawng an chim.cu pin ah Russia cozah nih nuclear hriamnam tluk deng in a cak mi bomb S-500 Pro­metetey zong ser dingin rian a t’uan cuahmah lio.

Russia cozah nih cun S-500 Pro­metetey bomb ser dingin rian a t’uan cuahmah mi cu,tlung tein kan ser khawh a si ah cun mah hi cu India ram le China le Turkey ram ah ka kuat hna lai tiah a chim.mah hi S-500 Pro­metetey bomb a rian t’uan ning cu nuclear bomb tluk deng in a cak mi a si SA-21 Growler air defence missile system nak in a cak deuh lai tiah an chim.hi kongah ram dang mi hna an aw-kaa theih awk a um hraw rih lo.

Source: BBC