‘TRUMP’S PEACE PLAN’ A Hlawhtlin Ah Cun Saudi Arabia Nih $10 Billion An Pek Hna Lai

Hi “Trump’s Peace Plan hi Palestinian Abbas nih a cohlan a si ah cun Saudi Crown Prince Mohammed bin Salman nih Palestinian nawlngeitu President Mahmoud Abbas sin ah $10 billion bak peek ding in a kamh. Hi kong hi Lebanese thawngzamhca Al-Akhbar nih an tlangzarh. Asinain senior Palestinian official Ramallah nih cun zeihmanh a chim duh lo.

Al-Akhbar nih an tlangzarh ning in, Prince Salman nih Abbas sin ah ‘Deal of the Century’ hi a tlangpi in a chimh. Saudi crown prince, Palestinian Authority, Minister le rian ttuantu pawl hna nih hin phaisa zeizat set dah an herh? tiah a hal. Abbas nih a chimmi cu, “Palestinian nih hin kum khat ah $ 1 billion cio cu ka kan herh” tiah a chim. Cucaah Saudi crown prince nih, “cuti a si ah cun kum 10 chung cu kumchiar in $ 1 billion kan pek hna lai” tiah a ti.

Remdaihnak kong ah US President Donald Trump khuakhanmi Palestinian nih an cohlan ah cun Saudi Arabia nih $10 billion bak pek an timh hna. An chimning in, President Trump nih Israel le Palestinian karlak caan saupi chung buainak cu daihter ding in ai tim. Cu ai timhtuahnak cu ‘Deal of the Century’ ti a si i a fawinak in “TRUMP’S PEACE PLAN” tiah auh a si.

Asinain Abbas nih a duh lo. A chimmi cu, ka ramkhel nun/rian (political life) pei a dih lai cu tiah a duh  lo. Al-Akhbar nih Salman le Abbas biaruahnak hi Ramallah ah Jordanian aiawhtu a simi Khaled al-Shawabked report ttial ning in tlangzarhmi a si.

Hi thil “TRUMP’S PEACE PLAN” nih hin Saudi Arabia le US rin ttuanttinak hi a sawsawh a silo zia a langhter. US le Saudi Arabia pehtlaihnak hi a thuuk ngaingai mi a si ti cu Saudi crown prince Mohammed bin Salman biachim nih hin a langhter ngaingai.