Tuchun Ah Ralhrangbu Minung Zaahnih Le Sawmnga Thah An Si

KNLA le Ralhrangbu I Kahnak Ah Rallokap 250 An thi, 100 leng An Tli Nihin August 4 ah Mon ramkulh Tathung pengah kahdoh dingin a ra mi ralhrangbu hna cu KNU/KNLA nih an kah hna i rallokap 250 nak tlawmlo an thi tiah theih a si.Ralhrangbu tat-mah 99 tang tatyin hna cu Tathung peng, Nanawttaw khua pawngah KNU nih tuzing zinglei sangah khan lam ah an bawh hna i an kah hna hi a si.

250 leng an thih hlei ah rallokap 100 leng cu an uniform phawih in an zaam tiah KNLA he a naihniam mi hna sin in theih a si.KNLA le ralhrangbu hna hi tuizing suimilam 8 hrawng in 12 tiang an i kap.I kahnak hi ralhrangbu leiin kahdoh dingin thazaang tampi he an rat lio ah KNLA nih lam in an bawh hna i an kah hna.KNLA lei zong 3 an nunnak a liam.KNLA nih ralhrangbu hriamnam zeimawzat an lak tiah Ayeyarwaddy Times nih a tial.

 

Relchap: Ralhrangbu Nih Tuah Mi Thimnak Hlaw In Kawlram Pressure Pek Dingin US Nih ASEAN A Nawl Nizaan August 2 ah ASEAN nih Kawlram palai thlah ding kong ceihnak ah uknak latu ralhrangbu nih kum 2 chungah thimnak ka tuah lai a ti mi cu caan a tlai ter duhnak a si tiah US ramdang pehtlaihnak vuanci Antony Blinken nih a chim.Blinken hi zarhkhat chung ASEAN ramdang pehtlaihnak vuanci hna meeting ah online in a kai cuahmah lio mi a si ve i, atu ah ASEAN cu Taluk le Joe Biden hruaimi US cozah kar nawlngeih i cuhnak cahmai pakhat bantuk a si.

ASEAN ramdang vuanci pawl biaruahnak an tuah hlan te ah Ralhrangbu nih rampi thimnak a tuah ding kong le uknak a lak hnuah a thanh mi emergency period cu 2023 August thla tiang ka thawn tiah a thanh.Hi kong he pehtlaih in US ramdang vuanci nih “ralhrangbu hruaitu nih caan a thawn mi hi a mah miaknak caah a tuah mi a si ti a fiang.Mah hi ASEAN nih fak deuh in riantuan seh a ti duhnak pakhat a si.ASEAN nih Kawlram kongah a ngeih cia mi hnatlaknak 5 cu a taktak in a nun ter a hau cang” tiah a ti.

Ralhrangbu thawngthanh mi nih lam dik a si lo. UN le ASEAN hna nih kan duh mi Kawlram ah democracy ukphung a um than khawhnak ding,ramkhel thonhtla vialte thlah ding, ralhrang cawlcanghnak ngol ding pawl he lam dang pi a si tiah UN chimhnak nawlngeitu Stephane Dujarric nih a chim.Stephane Dujarric nih ralhrangbu uknak a lak thla 6 chung cu “a thenthek dih deng mi caan vaivuan” a si. Covid-19 dirhmun zoh ah pawngkam dirhmun tiang thinphan awk ngai a si.

 

Ralhrangbu cawlcanghnak nih Kawlram mipi hna fimcawnnak, Ngandamnak le covid-19 dohnak telin harsatnak a tong lio mi Kawlram mipi zaangfah bawmnak tiang a don dih.A taktak ti ahcun Kawlram mipi covo a si mi anmah tein khuakhannak le an aiawh tu caah an duhmi minung/cozah thimnak nawl tiang a hrawh piak dih mi hna a si.Kanmah nihcun lungrual tein a um mi vawlei cung ram hna ruahnak kha a biapi cem ah chiah in thil kan tuah mi a si tiah UN chimnak nawlngeitu Stephane Dujarric nih a ti tiah CNA news nih a chim.

Ref: CNA ( TCP )