Vawlei cungah hin Bawipa lawmhter nakin a biapi deuhmi le a herh deuhmi dang a um ti lo

Ka fale biatak chungah khua an sa, ti thawng hlei in a ka lawmhter deuhtu zeihmanh a um ti lo. (3 John 1:4)

Vawlei ah a biapi bik le a herh bikmi cu: “hrinṭhan le Bawipa lawmhter” hi a si. Cu nakin a herh deuhmi le biapi deuhmi a um ti lo. Efesa 5:10 ah, “Bawipa a lawmhtertu thil kha kawl i zuam u,” tiah a kan chimh. Mahka hin zeiset hi dah Bawipa a lawmhtertu thil an si, ti fiang tein a kan chim lo. Asinain Bible hmun dang ah Bawipa a lawmhtertu hna le Bawipa a lawmhtertu thil fiang tein a kan chimh.

 

Mary nih Bawi Jesuh a lawmhternak cu, zeidang nakin Bawi Jesuh kha pakhatnak ah a chiah i Bawipa ke hram ah khan a ṭhu i a cawnpiaknak kha a ngaih. Solomon nih Bawipa a lawmhternak cu, fimnak a hal caah a si. Cu fimnak cu amah( Solomon) caah si loin Bawipa miphun Israel hruainak ding, hruai khawh nakding caah a si. Khattelei kam in chim ahcun Bawipa caah a si kan ti khawh. A ruang cu, Israel hruainak caah a si caah; Israel cu Bawipa thimmi miphun, Bawipa miphun an si.

 

Vawlei cungah hin Bawipa lawmhter nakin a biapi deuhmi le a herh deuhmi dang a um ti lo. Bawipa lawmhter cu, biatak chungah um, biatak chungah nun hi a si. Cu biatak chungah kan um khawh i kan nun khawh nakhnga, Thiang Thlarau pek kan sinak zong a si. Jesuh nih, “Asinain biatak phuangtu Thlarau a rat tikah biatak chungah cun an luhpi hna lai,” tiah a kan chimh. Cathiang nih, “ Pathian Thlarau nih a hruaimi hna cu Pathian fale an si,” a ti. (Rom 8:14).

 

Joshua le Kaleb nih, Bawipa kan cungah aa lawmh ahcun… an ti bangin ni fate kan nunnak ah hin Bawipa lawmhter hi a biapi bikmi a si. Bawipa a lawmhtertu hna hi thluachuak mi cu an si. Biatak chungah a ummi, khua a sami hna hi Bawipa a lawmhtertu cu an si.

Credit:http://Abraham Ram Lian Khar